काठमाडौं । सुनको मूल्य चार दिनदेखि लगातार घटेको छ । नेपाली बजारमा प्रतितोला २ लाख ७० हजार ६०० रुपैयाँको ऐतिहासिक उचाइमा पुगेको सुनको मूल्य यतिबेला घटेर २ लाख ५९ हजार ६०० रुपैयाँमा झरेको हो । यो ११ हजारको गिरावट हो ।
नेपाली बजारमा सुनको मूल्य घटबढको प्रत्यक्ष असर अन्तर्राष्ट्रिय बजारको मूल्यसँग हुने गरेको छ । आइतबार अर्थात् २८ डिसेम्बरको दिन सुनको अन्तर्राष्ट्रिय मूल्य प्रतिऔंस ४५३० अमेरिकी डलर पुगेको थियो । बुधबार ४३१७ अमेरिकी डलरमा झरेको छ । यसैको प्रत्यक्ष प्रभाव नेपाली बजारमा समेत देखिएको हो ।
तर अन्तराष्ट्रिय रुपमा चाहिँ सुनको मूल्य किन घट्यो त ? यसका पछाडि दुईवटा कारण रहेको अन्तराष्ट्रिय सञ्चार माध्यमहरूले जनाएका छन् । अन्तर्राष्ट्रिय सञ्चार संस्था सीएनबीसीका अनुसार अमेरिकी कमोडिटिज एक्सचेञ्ज संस्था सिकागो मर्कन्टाइल एक्स्चेञ्ज (सीएमई) ले बहुमूल्य धातुको मार्जिन दर बढाउनु यसको मुख्य कारण हो ।
बजारमा मूल्य बढ्दै जाँदा जोखिम समेत बढेपछि सीएमईले धातुजन्य वस्तुको खरिदमा खरिदकर्ताले राख्नुपर्ने मार्जिन बढाइदिएको थियो । यसले गर्दा लगानीकर्ताले मार्जिन कायम गर्न सुन बेच्नुपर्ने अवस्था भयो । जसले मूल्य घटाइदियो ।
अर्को कारण चाहिँ नाफा बुकिङ रहेको बताइएको छ । सन् २०२५ मा मात्रै सुनको अन्तर्राष्ट्रिय मूल्यमा ६६ प्रतिशत वृद्धि भइसकेको छ । नयाँ वर्ष लाग्दैगर्दा सुनमा लगानी गर्ने यस्ता संस्थाले सुन बेचेर नाफा बुकिङ गर्न थालेकोले पनि बजारमा मूल्य गिरावट भएको अन्तर्राष्ट्रिय सञ्चार माध्यमहरूले विश्लेषण गरेका छन् ।
