जनता 4k न्युज सिरहा । सिरहा नगरपालिकाको मुख्य सडकमा बहुप्रतीक्षित कालोपत्रे (पिच) कार्य सुरु भएको छ । वर्षौंदेखि धुलो, हिलो तथा जामको समस्या झेल्दै आएका स्थानीय बासिन्दाले सडक निर्माण कार्य सुरु भएपछि राहत महसुस गरेका छन् ।

नगरपालिकाले सडक पूर्वाधार सुधारलाई प्राथमिकतामा राख्दै मुख्य सडक कालोपत्रे कार्य अघि बढाएको जनाएको छ । अहिले सडक क्षेत्रमा ग्राभेल मिलाउने, रोलर सञ्चालन गर्ने तथा पिच बिछ्याउने काम तीव्र गतिमा भइरहेको छ ।

नगर प्रमुख डा. नबिन यादव ले नगरको विकास निर्माणलाई प्रभावकारी रूपमा अगाडि बढाइएको बताउँदै नागरिकलाई गुणस्तरीय सेवा दिने प्रतिबद्धता व्यक्त गरेका छन् । उनले भने,

“सिरहाको मुख्य सडक लामो समयदेखि समस्याग्रस्त अवस्थामा थियो । नागरिकले दैनिक रूपमा धुलो र हिलोको समस्या भोग्नुपरेको थियो । अब सडक कालोपत्रे भएपछि आवतजावत सहज हुनुका साथै नगरको सौन्दर्य पनि बढ्नेछ । हामी विकास निर्माणका कामलाई तीव्रता दिएका छौं ।”

स्थानीय व्यवसायी तथा सर्वसाधारणले सडक निर्माण कार्यले बजार क्षेत्रको व्यापार, यातायात र दैनिक जीवनमा सकारात्मक प्रभाव पर्ने विश्वास व्यक्त गरेका छन् । उनीहरूले निर्माण कार्य समयमै र गुणस्तरीय रूपमा सम्पन्न गर्न सम्बन्धित निकायसँग आग्रह गरेका छन् ।

नगरपालिकाका अनुसार निर्धारित समयभित्रै काम सम्पन्न गर्ने लक्ष्य राखिएको छ । सडक निर्माण सम्पन्न भएपछि स्थानीय नागरिकलाई सहज यातायात सेवा उपलब्ध हुनुका साथै नगरको समग्र विकासमा समेत टेवा पुग्ने अपेक्षा गरिएको छ ।