जनता 4k न्युज जनकपुरधाम — धनुषाको क्षिरेश्वरनाथ नगरपालिका–१०, हारसर गाउँ निवासी मो. जाबिर मान्सुरीलाई उपचारका लागि रु. २१,१०५ आर्थिक सहयोग प्रदान गरिएको छ।

स्थानीय समाजसेवी लक्ष्मेश्वर शाहको पहलमा वैदेशिक रोजगारीमा रहेका नेपाली युवाहरूको संस्था मधेश युवा संघ, कतारमार्फत संकलित उक्त रकम पीडितकै घरमै पुगेर हस्तान्तरण गरिएको हो। सहयोग कार्यक्रममा लक्ष्मेश्वर शाह, शम्भु चौधरी, सुरेन्द्र महतो लगायतको उपस्थिति रहेको थियो।

सहयोग प्राप्त गरेपछि मान्सुरीले कठिन समयमा साथ दिने सम्पूर्ण दाताहरू तथा संस्थाप्रति आभार व्यक्त गर्दै यस्तो सहयोगले आफूलाई नयाँ आशा र हिम्मत मिलेको बताए।

मधेश युवा संघ, कतार विदेशमा रहेका नेपाली युवाहरूको साझा समाजसेवी संस्था हो। यस संस्थाले विशेषगरी मधेश क्षेत्रका विपन्न, बिरामी तथा असहाय परिवारहरूलाई आर्थिक, नैतिक र सामाजिक सहयोग गर्दै आएको छ।

संस्थाले आपतकालीन स्वास्थ्य सहयोग, विपद् व्यवस्थापन, शैक्षिक सहयोग तथा सामाजिक सचेतनामूलक कार्यक्रममार्फत समाजमा सकारात्मक सन्देश फैलाउँदै आएको छ।

संस्थाका अध्यक्ष प्रताप साहका अनुसार सानो प्रयासले पनि ठूलो परिवर्तन ल्याउन सकिने विश्वासका साथ संस्था निरन्तर समाजसेवामा सक्रिय रहेको छ। आगामी दिनहरूमा पनि यस्ता मानवसेवामूलक कार्यलाई थप प्रभावकारी बनाउँदै लैजाने लक्ष्य संस्थाले राखेको जनाएको छ।